Нийтлэл

Архангай сүмийн хамт олон Баярын мэдээгээр дамжуулан сүмд шинээр ирсэн хүмүүстэйгээ халуун дотно нөхөрлөлийг бий болгон, тэдэнд эрүүл мэндийн үйлчлэлүүд болох алтан зүү эмчилгээ болон бариа заслын эмчилгээг хийжээ. Энэхүү үйлчлэл долоо хоног бүрийн мягмар гарагт явагддаг бөгөөд олон хүн Эзэнээс ирэх эдгэрэл, амар тайван, ивээл ерөөлийг мэдэрч байна.

Булган сүмд өнгөрсөн 5-р сард Улаанбаатар хотоос дотоодын баг хүрэлцэн ирж, орон нутгийн гишүүдтэй хамтран баярт мэдээний үйлчлэлийг амжилттай зохион байгууллаа.

Энэхүү үйлчлэлийн үр дүнд сүмийн нэг гишүүнийг тонгги алтан зүүний эмчилгээний аргачлалд сурган бэлтгэв. Мөн Булган сүм анх байгуулагдаж байх үед үйлчилж байсан ахан дүүс эргэн ирж, баярт мэдээний үйлчлэлд хамтран оролцсон нь энэ сарын онцлох үйл явдлуудын нэг байлаа.

Дөрвөн өдрийн турш үргэлжилсэн сургалт, семинарт олон хүн хамрагдаж, тонгги тавиулан бие, сэтгэлийн сэргэлт авч, амьдралдаа эерэг өөрчлөлтүүдийг мэдрүүлсэн ерөөлтэй цаг хугацааг байлаа.

Сүмийн гишүүдийн идэвх санаачилга, хамтын оролцооны үр дүнд сүмийн орчинд явган хүний зам байгуулсан нь тэдний нэгдмэл хөдөлмөрийн бодит үр дүн болсон юм.

Түүнчлэн “Өглөөний дасгал хөдөлгөөн – Эрүүл амьдралын эхлэл” уриан дор өглөө бүр 06:30 цагаас хамтран дасгал хөдөлгөөн хийж эхэлсэн бөгөөд гишүүдийн бие бялдар, эрүүл амьдралын хэвшлийг дэмжих сайхан боломж болж байна.

Шинэ хүний анги ч тогтмол хичээллэж, суралцагчид итгэлийн амьдралдаа өсөн хөгжсөөр байна.

Энэ сарын турш бүхий л үйлчлэл үр өгөөжтэй болж, нөхөрлөл, айлчлал арвинтай, Бурханы ивээлээр дүүрэн өдрүүд үргэлжиллээ. Булган сүмийнхний хийсэн үйлчлэл бүхэнд Эзэний мутар хамт байх болтугай.

Мөн Хүүхдийн баярыг тохиолдуулан зохион байгуулсан Библийн АХА тэмцээний 8–10 насны ангилалд Булган сүмийн бяцхан гишүүн Б.Гандиймаа тэргүүн байр эзэлсэн юм. Тэрээр цуглаанд тогтмол оролцож, үе тэнгийн найзууддаа Библийн түүхээс хуваалцдаг бөгөөд энэхүү хичээл зүтгэл, суралцах хүсэл нь амжилтынх нь үндэс болсон юм. Эртний Сударт “Тиймээс, хайрт ах дүүс минь, бат зогсогтун. Эзэний ажилд үргэлж бялхаж бай. Учир нь Эзэн доторх та нарын хөдөлмөр хоосон биш гэдгийг мэддэг билээ.”/ 1 Коринт 15:58/ хэмээн өгүүлсэн байдаг. Иймээс бид бүгд Бурханы үгийг үргэлж судалж, бусдад хуваалцан, итгэл дотор өсөн хөгжиж, Эзэнийг алдаршуулан амьдарцгаая.

Бидний хөдөлмөр, үйлчлэл бүхэн Эзэний өмнө үнэ цэнтэй билээ. Ирэх өдрүүдэд ч итгэл, хайр, үйлчлэлээрээ өсөн хөгжиж, олон хүний амьдралд сайн мэдээний гэрлийг түгээх ерөөл дүүрэн байх болтугай.

Хүүхдийн баярт зориулсан Библийн асуулт, хариултын АХА тэмцээний эхний шат амжилттай болж өнгөрлөө.

Энэ удаагийн тэмцээнийг NextGen Union залуус зохион байгуулсан бөгөөд өмнө нь уламжлалт хэлбэрээр явагддаг байсан тэмцээнийг орчин үеийн техник, технологийн шийдэл болох Kahoot аппликейшныг ашиглан явуулснаараа онцлог байв. Ингэснээр оролцогчдын оноо, дүн мэдээг богино хугацаанд, ил тод бөгөөд шуурхай гаргах боломж бүрдсэн юм.

Тэмцээний 8–10 насны ангилалд :

1-р байр – Б. Гандиймаа (Булган сүм)

2-р байр – Б. Амгалан (Хилчин сүм)

3-р байр – Г. Гэгээ (Гайхамшигт хайр сүм) тэргүүллээ.

Хилчин Мөрч клуб 2026 оны 5-р сард нийтэд тустай үйлчлэлийн хүрээнд хандивын худалдаа болон асрамжийн газрын хүүхдүүдэд чиглэсэн сайн үйлсийн аяныг амжилттай зохион байгууллаа.

Үйл ажиллагааны хүрээнд амбаарт хадгалагдаж байсан хувцаснуудыг ангилан, зарах боломжтой хувцаснуудыг ялгаж, угаах шаардлагатайг нь цэвэрлэн бэлтгэсэн байна. Мөн клубын гишүүд өөрсдийн гэртээ өмсөхгүй болсон хувцаснуудыг хандивлаж, сайн үйлсийн аянд нэгдлээ.

Хандивын худалдааг 21-р хорооллын автобусны буудал дээр 13:00–16:00 цагийн хооронд зохион байгуулж, нийт 221,400 төгрөгийн орлогыг төвлөрүүлжээ.

Тус орлогоос 104,000 төгрөгөөр сүмдээ зориулан 25 кг будаа болон 5 литр ургамлын тос худалдан авчээ. Харин үлдсэн 117,400 төгрөгөөр Нархан хотхоны асрамжийн газрын хүүхдүүдэд зориулан ааруул, жүрж, ашигтай бактеритай ундаа бүхий 47 ширхэг бэлгийн багц бэлтгэн, 5-р сарын 16-ны Шаббатын өдөр айлчлан гардуулжээ.

Онцлох нэгэн сайхан үйл явдал нь Хөгжилтэй Аялагч клубын сурагч Б.Боорчи хичээл дээрээ сурсан цаасан онгоц хийх чадвараа бататган, өөрийн гараар 25 ширхэг цаасан онгоц урлан асрамжийн газрын бага насны хүүхдүүдэд бэлэглэсэн явдал байлаа. Энэ нь хүүхдүүдийн сэтгэлд баяр хөөр бэлэглэсэн төдийгүй бусдад хайр түгээх чин сэтгэлийн илэрхийлэл болсон юм.

Энэхүү үйл ажиллагаанд сүмийн гишүүд идэвхтэй оролцож, хувцас угаах, хандивлах, гар хийцийн талх авчирч худалдах, жүрж хандивлах, автомашинаар тээвэрлэх, худалдаанд биечлэн оролцох зэрэг олон талын бодит дэмжлэг үзүүлснээр сайн үйлсийн аян амжилттай хэрэгжлээ.

Тус үйлчлэл нь бусдад туслах сэтгэл, хамтын ажиллагаа, Бурханы хайр энэрлийг бодитоор харуулсан онцгой үйл ажиллагаа болсон байна.

Харилцаа Холбооны хэлтэс 2026.05.18.

39 дэх удаагийн “Номын баяр” 2026 оны 5 дугаар сарын 15–17-ны өдрүүдэд Сүхбаатарын талбайд зохион байгуулагдана. Энэ удаагийн арга хэмжээнд Монголын Адвентист чуулган оролцож, чуулганаас эрхлэн гаргасан нийт 21 нэр төрлийн номыг уншигчдын хүртээл болгох юм.

Мөн “Амьдралынхаа жинхэнэ үнэ цэнийг хэрхэн хэмжих вэ?”, “Эрчүүд яагаад секс хүсдэг вэ?”, “Эмэгтэйчүүд яагаад хайр хүсдэг вэ?”, “Эрчүүд яагаад үг сонсдоггүй вэ?”, “Эмэгтэйчүүд яагаад зүг чигээ олдоггүй вэ?” зэрэг шинэ номууд худалдаална.

Та бүхнийг Чингис хааны хөшөөний зүүн урд талд байрлах манай асарт хүрэлцэн ирж, сонирхолтой шинэ номуудтай танилцан, өөрийн уншиж амжаагүй бүтээлүүдээс худалдан авч, өргөнөөр оролцохыг урьж байна.

Номын баярын өдрүүдэд шинэ болон ховор номуудын үзэсгэлэн худалдаа, гэрэл зургийн үзэсгэлэн, зохиолч уншигчдын уулзалт, уран зохиолын уншлага, сонсдог номын цаг, яруу найргийн өдөрлөг зэрэг бүх насны уншигчдад зориулсан соёл, урлагийн олон талт арга хэмжээнүүд зохион байгуулагдах болно.

Харилцаа Холбооны хэлтэс 2026.05.15.

Булган сүмийн гишүүд өөрсдийн санхүүгээр нэг хүн нэг шуудай цемент авчирч, явган хүний замаа хамтдаа цутган хийлээ. Энэ өдөр тэд нэгдэн нөхөрлөж, Баярт мэдээний үйл ажиллагааны бэлтгэлээ ч мөн хамтдаа базааж авлаа.

Тэд нэг зүрх, нэг сэтгэлээр Эзэний өргөө рүү орох замыг засаж, эв нэгдэлтэй хамт олон гэдгээ бодитоор харуулсан юм. Баяр хөөр, урам зориг дүүрэн энэ ажлыг хамтдаа амжилттай гүйцэтгэсэн талаар сүмийн ахлагч Д.Амаржаргал бидэнтэй хуваалцлаа.

“Та нар юу ч хийсэн, хүмүүст бус харин Эзэнд мэт чин сэтгэлээсээ хийгтүн.” Колоссай 3:23

Харилцаа Холбооны хэлтэс 2026.05.14

“Тэрбум мод” үндэсний өдрийн хүрээнд “Хоймор хайрхан”-д энэ амралтын өдрүүдээр БОУАӨЯ-ны харьяа Байгаль орчны улсын хяналтын газрын албан хаагчид, Амос ТББ-ын “Хөгжилтэй аялагч” клуб, “Мөрч-Pathfinder” клубийн гишүүд хамтран мод тарьжээ.

Нийт 56 оролцогч хамтдаа 900 ширхэг мод тарьж, байгаль дэлхийгээ хамгаалах, ногоон ирээдүйг бүтээх үйлсэд өөрсдийн хувь нэмрээ орууллаа.

Энэхүү арга хэмжээ нь байгаль орчноо хайрлан хамгаалах ухамсрыг түгээх, хүүхэд залуусыг экологийн боловсролтой, зөв дадалтай иргэн болгон төлөвшүүлэхэд чухал ач холбогдолтой байлаа.

“ЭЗЭН Бурхан хүнийг авч, Едений цэцэрлэгийг арчилж хамгаалуулахаар тэнд суулгав” хэмээн Эхлэл 2:15 дээр бичсэнчлэн бид байгаль дэлхийгээ хайрлан хамгаалж, ирээдүй хойч үедээ ногоон орчныг өвлүүлэх үүрэгтэй билээ.

Бидний тарьсан нэг мод ирээдүйн цэвэр агаар, ногоон хөгжил, эрүүл орчны эхлэл юм.

Хамтран оролцсон итгэгч, клубийн хамт олон, идэвхтэй оролцогч та бүхэндээ чин сэтгэлийн талархал илэрхийлье.

“Хөтөлийн гэрэл” сүмийн хамт олон 4-р сарыг “Библийг зохистой уншихуй” уриан дор утга учиртай, үр бүтээл дүүрэн өнгөрүүлжээ. Сарын турш гишүүдийн оролцоо, идэвх санаачилга онцгой байж, сүнслэг өсөлт, хамтын нэгдлийг бэхжүүлэх олон ажлууд амжилттай хэрэгжсэн байна.

Сарын онцлох үйл явдлын нэг нь сүмийн гишүүн 80 настай Эрдэнэбат ахын урам зориг хайрласан номлол байлаа. Түүний амьдралын туршлага, итгэл дүүрэн үгс нь оролцогчдод гүн сэтгэгдэл төрүүлж, залуу үед үлгэр дуурайл үзүүлсэн ач холбогдолтой үйл явдал болсон юм.

Мөн Шаббат хичээлийг тогтмол уншиж, амьдралдаа хэрэгжүүлэх зорилгоор тусгай хуваарийн дагуу хүн бүр өөрийн хариуцсан хэсгийг авч яван, хамтын оролцоог нэмэгдүүлэх шийдвэр гаргасан нь онцлог байлаа.

Хүүхдийн ангид багш Д. Тунгалаг, Т. Долгорсүрэн нар хичээл зааж, бяцхан суралцагчдыг сүнслэг боловсролд хөтлөн, тэдний хөгжилд чухал хувь нэмэр орууллаа.

Түүнчлэн 4-р сарын турш өглөө бүр 06:30 цагт “Ерөөлийн уулан дээрх сургааль” номоор тасралтгүй лайв хичээл зохион байгуулж, гишүүдийг өглөөг утга учиртай эхлүүлэхэд дэмжлэг үзүүлжээ. Үүний зэрэгцээ 07:30 цагт “Эцэг өвгөд ба эш үзүүлэгч” номыг тогтмол судалж, мэдлэгээ гүнзгийрүүлжээ.

Онлайн орчинд ч гишүүдийн оролцоо идэвхтэй байж, Ганчимэг, Оюунаа, Тунгалаг нар болон бусад гишүүд өдөр бүр Библийн үгийг ээлжлэн хуваалцаж, олон нийтийг урамшуулжээ.

Ийнхүү “Хөтөлийн гэрэл” сүмийнхэн 4-р сарыг хамтын хичээл зүтгэл, итгэл сэтгэлээр дүүрэн өнгөрүүлж, ирэх саруудад улам ихийг бүтээх эрч хүчийг хуримтлуулжээ.

Харилцаа Холбооны хэлтэс 2026.05.05

Ахмадын фитнесс ангид хамрагдсан ахмадууд Нөлөөллийн төв нээгдсэнээс хойш тогтмол хичээллэж, нэг сарын хугацаанд гарсан өөрчлөлт, үр дүнгээ дүгнэсэн өдөр боллоо. 65–75 насны оролцогчид биеийн үзүүлэлтүүдээ хэмжүүлж, бодит ахиц дэвшлээ харсан нь онцлох үйл явдал байв.

Нэг сарын хугацаанд булчингийн масс нэмэгдэж, илүүдэл өөх багасч, жин эрүүл, зөв аргаар хасагдсан нь ажиглагдлаа. Богино хугацаанд ийм мэдэгдэхүйц үр дүн гарсан нь ахмадуудад урам зориг өгч, цаашид идэвхтэй хичээллэх хүсэл эрмэлзлийг улам нэмэгдүүлжээ.

Өмнө нь их даарч, зузаан хувцасладаг байсан бол одоо нимгэн хувцастай дасгал хийх боломжтой болсон нь цусны эргэлт сайжирсны илрэл юм. Мөн нойрны чанар сайжирч, биеийн ерөнхий байдал мэдэгдэхүйц дээрдсэн талаар оролцогчид онцолсон байна.

Оролцогчдын сэтгэгдэл

Л.Мөнх-Эрдэнэ (Амгалан сүм)
“Дасгал хөдөлгөөнд хамрагдаад нэг сар болж байна. Энэ хугацаанд жин хасаж, өөхний хэмжээ буурч, булчингийн масс нэмэгдсэн. Цусан дахь сахарын хэмжээ 6.3-аас 5.2 болж буурсан нь хамгийн том ахиц байлаа. Хүчний дасгал тогтмол, зөв хийх нь жин хасахад хамгийн үр дүнтэйг ойлгож авсан. Ийм боломж бүрдүүлсэн чуулганы хамт олонд маш баярлалаа.”

Н.Одсүрэн (УБ төв сүм)
“Багшийн зааварчилгаатай дасгал хийх нь маш чухал юм байна гэдгийг ойлголоо. Өөрөө хийхэд үр дүн бага байсан бол зөв техникээр, тогтмол хийснээр булчин нэмэгдэж, жин хасагдсан. Бие хөнгөрч, сэтгэл санаа ч өөдрөг болсон. Нас бол тоо гэдгийг үнэхээр мэдэрлээ.”

Т.Эрдэнэцоо (Төв сүм)
“Дасгал хийснээр бие хөнгөрч, бүсэлхийн тойрог багассан. Булчингийн масс нэмэгдсэнд баяртай байна. Цаашид дасгалаа тууштай үргэлжлүүлж, эрүүл амьдралын хэв маягаа хадгална гэж бодож байна.”

М.Уранчимэг (УБ төв сүм)
“Нэг сарын хугацаанд маш сайхан өөрчлөлт гарлаа. Булчингийн масс нэмэгдэж, нойр сайжирсан. Бие хөнгөрч, эрч хүчтэй болсон нь хамгийн том өөрчлөлт байлаа.”

Ш.Цэрэн-Янжин (Төв сүм)
“Дасгалд хамрагдахаас өмнө хаван ихтэй, амьсгаа давчиддаг байсан бол одоо хаван буурч, амьсгал хэвийн болсон. Зүрх дэлсэхээ больж, толгой өвдөх нь ч багассан. Өмнө нь даардаг байсан бол одоо даарахаа больсон. Дасгал хөдөлгөөн хүний амьдралд ямар чухал болохыг өөрийн биеэр мэдэрлээ.”

Ахмадын фитнесс хөтөлбөр нь богино хугацаанд ч бодит, эерэг үр дүн өгдөг болохыг энэхүү нэг сарын туршлага харууллаа. Эрүүл мэндээ сайжруулах, идэвхтэй амьдрах хүсэлтэй хэн бүхэнд энэхүү хөтөлбөр нээлттэй бөгөөд “Нас бол зүгээр л тоо” гэдгийг оролцогчид өөрсдийн биеэр батлан харууллаа.

Эрдэнэт сүм сүүлийн үед зөвхөн дотоод үйл ажиллагаандаа анхаарахаас гадна нийгэмд нөлөөлөхүйц, бие даасан сүм болох зорилго тавин ажиллаж байна. Энэ хүрээнд сүмдээ тогтвортой санхүүгийн эх үүсвэр бүрдүүлж, өөрсдийн хуримтлалтай болох алхмуудыг хийж эхэлжээ. Сүмийн зүгээс Бурханы хүсэл, төлөвлөгөөтэй нэгдэн ажиллахыг эрмэлзэж байгаа бөгөөд цаашид үйл ажиллагаа илүү өргөнөөр харж залбирч байна.

Өмнө нь хүүхдийн ангиа тохижуулж, түүгээр дамжуулан санхүүгийн эх үүсвэр бий болгох хүсэл тээж явсан бол одоо энэ нь бодит ажил хэрэг болж байна. Сүмийн заалыг Ням гаригийн сүмд түрээслүүлснээр орлогын эх үүсвэр нэмэгдэж, цаашдын боломжууд нээгдэж байгаа юм. Мөн шинээр нэмэгдсэн түрээслэгчтэй хамтран хүүхдийн ангиа бага багаар засаж, сайжруулах боломж олдож “Бурхан үнэхээр гайхалтайгаар ажиллаж байна” хэмээн онцолсон юм.

Өнөөдрийн жижиг мэт санагдах алхмууд ирээдүйн том үр жимсний эхлэл болж, зөвхөн санхүүгийн бие даасан байдал төдийгүй олон хүнд хүрч үйлчлэх нөлөөллийн төв болох замыг нээж байгаа нь дамжиггүй бизээ.

Мөн Эрдэнэт сүмийн хамт олон ахлагч М.Ариунааг эзгүйд ч библи судлалаа бүлгээрээ судлан итгэмжтэйгээр үйлчилсээр байна. Тэд хамгийн сүүлд "Бардам зан ба Даруу байдал" хичээлийг гүнзгийрүүлэн судалжээ. Сүмийн гишүүдээ нэгдсэн зохион байгуулалтад оруулсан Алюша, Мандах, Буяндэлгэр, Гандолгор Бадарч та бүхнээр бахархаж байна. Бурхан та бүхнийг удирдан чиглүүлэх болтугай.

Харилцаа Холбооны хэлтэс 2026.04.28.

Булган сүмийн ахлагч Амаржаргал нэг сарын хугацаанд Улаанбаатар хотод Теологийн сургалтад хамрагдан суралцах үеэр сүмийн үйлчлэл тасралтгүй өрнөж, дөрөвдүгээр сарын турш ивээл дүүрэн, үр өгөөжтэй өдрүүд үргэлжиллээ.

“Бурхан та нарын үйлс болон Түүний нэрийн төлөө үзүүлсэн хайрыг мартахгүй” хэмээх Еврей 6:10-ын амлалт энэ хугацаанд бодитоор биеллээ оллоо.

Сүмийн гишүүд долоо хоног бүрийн Библи судлалыг идэвх санаачилгатайгаар зохион байгуулж, үгээр тэжээгдэн, итгэлдээ өсөн бэхжиж байна. Нөхөрлөл, залбирал, шаббат хичээл судлал хосолсон эдгээр уулзалтууд нь сүмийн амьдралыг улам гэрэлтүүлж, сүнслэг өсөлтийн сайхан уур амьсгалыг бүрдүүлж байна.

Мөн Шаббатын мөргөлийн хөтөлбөрүүд хуваарийн дагуу эмх цэгцтэй зохион байгуулагдаж, гишүүн бүр өөрийн авьяас чадвар, зүрх сэтгэлээ зориулан Бурханд итгэмжтэй үйлчилсэн нь бахархалтай байлаа.

“Та нар юу ч хийсэн, хүмүүст бус харин Эзэнд мэт чин сэтгэлээсээ хийгтун. Учир нь та нар Эзэнээс өв залгамжлалын шагналыг хүлээн авна гэдгээ мэднэ. Та нар Эзэн Христэд үйлчилж байгаа юм” хэмээх Колоссай 3:23-24-ийн үгс энэ үйлчлэл бүрд амилсан мэт…

Түүнчлэн сүмийн цэвэр цэмцгэр орчныг хадгалах үйлст гишүүн бүр чин сэтгэлээсээ оролцож, хариуцлага, нэгдмэл байдлын үлгэр жишээг харууллаа.

Булган сүм ийнхүү итгэл, эв нэгдэл, үйлчлэлээрээ улам бэхжиж, Бурханы ивээл дор өсөж хөгжсөөр байна. Сүмийг үргэлж тэтгэн ивээж, өсгөн бэхжүүлдэг Бурханд бүх алдар, талархлыг өргөе. Амен.

Харилцаа Холбооны хэлтэс 2026.04.27

Хан-Уул дүүргийн 8 дугаар хороонд байрлах “Илчлэлт” сүмийн дэргэдэх хүүхдийн зургийн дугуйлангийн нэг сарын ажлын үр дүнг харуулсан “Бяцхан зураачдын ертөнцөөр” тайлант үзэсгэлэн амжилттай зохион байгуулагдлаа.

Тус үзэсгэлэнд дугуйлангийн 14 суралцагч оролцож, өөрсдийн бүтээсэн өнгө будгийн баялаг ертөнцийг гэр бүл, дотны хүмүүстэйгээ хуваалцсан юм. Ердөө ганцхан сарын хугацаанд хүүхдүүд авьяас чадвараа нээн хөгжүүлж, сонирхолтой, өвөрмөц уран бүтээлүүд туурвисан нь арга хэмжээний онцлох хэсэг байлаа.

Арга хэмжээний үеэр зургийн багш Шүрэнцэцэг “Уран зураг хүүхдийн төлөвшил, сурах идэвхд хэрхэн нөлөөлдөг вэ?” сэдвээр эцэг эхчүүдэд зориулсан мэдээлэл, зөвлөгөө өгсөн бол сүмийн ахлагч Л.Болор-Эрдэнэ “Илчлэлт” сүмийн үйл ажиллагаа болон Библийн үнэ цэнийн талаар танилцуулга хийлээ.

Тус зургийн дугуйлан 6–16 насны хүүхдүүдийг хоёр насны ангиллаар хүлээн авч, өглөө болон оройн ээлжээр хичээллэж байгаа билээ.

Хэрэв та тус дугуйланд хүүхдээ бүртгүүлэхийг хүсвэл 9564-8315, 9507-6599 холбогдоорой.

Хаяг : Хан-Уул дүүргийн 8 дугаар хороо, 5 дугаар гудамж, 261 тоот
(60 дугаар сургуулийн баруун талд, “Илчлэлт” сүм)

Харилцаа Холбооны хэлтэс 2026.04.20.