Айлчлалын хүрээнд зөвхөн сүмийн үйл ажиллагааг дэмжээд зогсохгүй, ахлагч Э.Сувданчимэгийн төрсөн нутаг болох Хэнтий аймгийн Батноров суманд иргэдэд зориулсан нийгэм, хувь хүний хөгжилд чиглэсэн үйл ажиллагааг мөн зохион байгууллаа.
6-р сарын 13-нд зургаан багийн 150 гаруй малчин иргэнийг хамруулсан “Харилцаа–Амьдралын Үндэс” сэдэвт үнэ төлбөргүй сургалт, илтгэлийг амжилттай зохион байгууллаа. Энэхүү сургалт нь оролцогчдод зөв харилцаа, зөв үнэт зүйлс, итгэл найдварын тухай чухал ойлголтуудыг түгээсэн үр өгөөжтэй арга хэмжээ болсон юм.
Батноров суманд амьдардаг, сүмийн үйл ажиллагааг сонирхдог хоёр ч гэр бүлээр зочлон, Бурханы үгийг хуваалцаж, тэдний төлөө залбирч, Христийн хайрыг гэрчлэх үнэ цэнтэй боломж тохиосон юм. Түүнчлэн сүмийн гишүүн Мядагмаагийн гэр бүлээр айлчлан, нутгийн иргэдтэй нөхөрлөж, Бурханы бүтээлийн гайхамшиг болон түүний хайр, нигүүлслийн тухай сайн мэдээг түгээлээ.
Хэнтийн уудам тал нутаг, үзэсгэлэнт байгалийн дунд өнгөрүүлсэн эдгээр өдрүүдэд Бурханы мутар хүчтэйгээр ажиллаж, олон хүний зүрх сэтгэлд итгэлийн гал дүрэлзэн ассан мартагдахгүй мөч байлаа.
Эзэн Бурхан та бүхний хөдөлмөр, үйлчлэлийг арвин ихээр ивээж, сайн мэдээний ажил тань улам бүр өргөжин тэлэх болтугай.
Мөн та бүхнийг Хэнтий аймгийн “Итгэлийн Аян” сүм болон Батноров суманд Бурханы Үгийг хүлээн авсан хүн бүрийн төлөө залбиралдаа санаж байхыг уриалж байна.
“Тиймээс ах дүү нар минь, та нарын зүдрэл зүтгэл Эзэн дотор хоосон биш гэдгийг мэдэж, тууштай байж, гуйвж дайвалгүй, Эзэний үйл хэргээр үргэлж бялхаж бай.” (1 Коринт 15:58)
Харилцаа холбооны хэлтэс 2026.06.14
