Тийм учраас бие биеийнхээ өмнө нүглээ хүлээн зөвшөөрч, бие биеийнхээ төлөө залбир. Ингэснээр та нар эдгээгдэх болой. Зөвт хүний залбирал нь үр нөлөөтэй бөгөөд ихийг гүйцэлдүүлж чадна. ( ИАКОВ 5:16 )
Хүний амьдралд зам мөрийг нь чиглүүлж, зан чанарыг нь төлөвшүүлдэг эрхэм хүмүүс бий. Тэдний нэг нь Хэнтий аймгийн Батноров сумын уугуул, өдгөө 83 насны босгыг алхаж буй Н.Сэр-Од эмээ юм.
Хэнтий сүмийн ахлагч эмээгийн хайртай охин Э.Сувдаагийн бага нас эмээтэй нь салшгүй холбоотой. Тэрээр эмээгээсээ зөвхөн халамж хайр төдийгүй хүнлэг нинжин сэтгэл, бусдад байгаа бүхнээсээ хуваалцах өгөөмөр зан, энэрэнгүй амьдралын үлгэр дуурайллаас суралцжээ.
Э.Сувдаа : "Өнөөдөр би ямар хүн болж төлөвшсөн байна, тэр бүхний суурийг эмээ минь тавьсан. Эмээ эртлэн босож, хөдөлмөрлөдөг нэгэн байсан бөгөөд бусдад чин сэтгэлээсээ тусалдаг, гар дээрээ байгаа бүхнээ бусадтай хуваалцдаг өгөөмөр зан чанартай хүн байсан юм. "Эмээ шиг минь олон буурай Бурханы хайрыг мэдэрч, Аврагчаа танин мэдээсэй" хэмээн хүсдэгээ ч тэрээр бидэнтэй хуваалцлаа.
Харамсалтай нь хоёр жилийн өмнөөс чихрийн шижингийн хүндрэлээс болж эмээ нь хараагаа алдсан байна. Гэсэн ч энэ нь түүний итгэл найдварын төгсгөл болсонгүй.
2025 оны хоёрдугаар сард эмээгийн биеийн байдал эрс муудаж, амь нас нь тун аюултай нөхцөл байдалд орж байжээ. Ах дүү хамаатан садангууд нь лам хараар явж үзүүлж байсан бөгөөд ердөө 7 хоногийн настай хэмээн хүртэл хэлж, төрөл төрөгсөд нь цугларан уулзаж байжээ. Ийм хүнд цаг үед Э.Сувдаа Бурханд итгэх итгэлээ орхиогүй. Тэрээр: "Би итгэлээ алдаагүй. Бурхан замыг нээнэ гэдэгт итгэсэн учраас эмээгээ хот руу авч явж, Улсын хоёрдугаар эмнэлэгт хүргэсэн." гэж дурсан ярисан юм.
Энэ хугацаанд сүмийн эмэгтэйчүүдтэй нэгдэн өдөр бүр эмээгийнх нь төлөө чин сэтгэлээсээ залбирч байлаа. Хүний нүдэнд найдвар бараг үгүй мэт санагдсан тэр мөчид Бурхан Өөрийн хүчийг харуулсан юм.
Ердөө 10 хоногийн эмчилгээний дараа эмээгийн биеийн байдал гайхалтайгаар сайжирч, эмнэлгээс гарсан нь гэр бүл, төрөл төрөгсөд төдийгүй эргэн тойрны олон хүнийг алмайруулсан юм. Энэ үйл явдлын дүнд Сувдаагийн итгэж найддаг Бурхан үнэхээр амьд бөгөөд залбиралд хариулдаг юм байна гэсэн итгэлийг олон хүний зүрхэнд төрүүлжээ.
"Бурханы хувьд боломжгүй зүйл гэж үгүй." (Лук 1:37)
Өнөөдөр эмээ асаргаанд байдаг ч өдөр бүр Христийн сайн мэдээг сонсож, итгэлээрээ тайтгардаг болсон нь түүний амьдралын хамгийн сайхан бэлгүүдийн нэг ажээ. Хараагүй болсон ч Бурханы Үгийг сонсох боломжтой болсон нь Годпод төхөөрөмж түүний өдөр бүрийн хань, сэтгэлийн тайвшрал болсоор байна.
Э.Сувдаа : "Эмээгээ Христийн сайн мэдээ сонсон тайвширч байгааг харах бүрд сэтгэл минь амар амгалан болдог. Залбирал хэзээ ч дэмий байдаггүйг би өөрийн нүдээр харсан." хэмээн итгэл төгс өгүүлсэн юм.
Өдгөө долоон үр хүүхэд, зуу гаруй ач, гучтай энэ буурай Бурханы нигүүлслийн амьд гэрч болсоор байна. Тэрээр ойрын хугацаанд усан баталгаа хүртэх нь дамжггүй бизээ.
Энэ бүхний ард Христийн сайн мэдээг радио, аудио төхөөрөмжөөр дамжуулан хүргэж, өндөр настнуудын амьдралд итгэл, найдвар, амар амгаланг түгээж буй үйлчлэлийн ач тус асар их гэдгийг Э.Сувдаа дахин дахин онцлон хэлсэн юм.
Тэрээр энэхүү үйлчлэлийг хэрэгжүүлж буй бүх хүмүүст чин сэтгэлийн талархлаа илэрхийлээд: "Бурханы Үгийг сонсох боломжийг эмээд минь бүрдүүлж өгсөн та бүхэнд гүнээ баярлалаа. Энэ бол зөвхөн нэг төхөөрөмж биш, харин итгэл найдвар, тайтгарал, мөнхийн амийн сайн мэдээг түгээж буй үнэт бэлэг юм." хэмээн сэтгэлийн үгээ дайлаа.
"Харин итгэл нь сонсохоос, сонсох нь Христийн үгээр ирдэг." (Ром 10:17)
Христэд итгэгч бид өдөр бүр Библийг судалж, хайр энэрэл, үйлс амьдралаараа гэрчилж амьдрах нь бидний эрхэм дуудлага юм.
Энэхүү гэрчлэл нь залбирал хэзээ ч талаар өнгөрдөггүй, Бурхан Өөрт нь итгэн найдсан хүмүүсийн гуйлтыг сонсдог амьд Бурхан гэдгийг дахин сануулж байна.
Иймд та бүхнийг Н.Сэр-Од эмээгийн эрүүл энх, итгэл нь улам батжин, Бурханы хайр, нигүүлслийг өдөр бүр илүү гүнзгий мэдэрч, удахгүй усан баталгаа хүртэж Эзэндээ өөрийгөө бүрэн зориулан даатгахын төлөө сэтгэл нийлүүлэн залбирахыг хүсэн уриалж байна.
"Юунд ч бүү санаа зов. Харин аливаа зүйлд залбирал ба гуйлтаар талархалтайгаар хүсэлтүүдээ Бурханд мэдүүл." (Филиппой 4:6)
Харилцаа Холбооны хэлтэс 2026.07.01
