2026 оны 6-р сарын 12–14-ний өдрүүдэд Монголын Адвентист Чуулганы удирдлагууд болон оффисын ажилтнуудын ээлжит айлчлал нь Хэнтий аймгийн Чингис хотод байрлах “Итгэлийн Аян” сүм байлаа. Энэ өдрүүдэд Бурханы хайр, нигүүлсэл онцгойгоор илэрч, олон хүний амьдралд шинэ итгэл, шинэ найдвар бэлэглэсэн ерөөлтэй үйл явдлууд өрнөжээ.
Сүмийн ахлагч Э.Сувданчимэг өөрийн нөөц боломжоо дайчлан, ойр дотны хамтран зүтгэгчдэдээ уриалан сайн мэдээний үйл ажиллагааг тууштай зохион байгуулж иржээ. Үүний үр дүнд хүүхэд багачууд, ахмад настнууд зэрэг олон хүн сүмийн үйл ажиллагаанд идэвхтэй хамрагдаж, 8 хүн Есүс Христийг дагахаар шийдвэр гаргасан бөгөөд тэднээс 4 нь Эзэн Есүсийг хувийн Аврагчаа хэмээн хүлээн авч, усан баталгаа хүртлээ.
Ахлагч Э.Сувданчимэгийн гал цогтой, тууштай үйлчлэл эдгээр өдрүүдэд онцгой тод харагдаж байлаа. Ялангуяа түүний нөхөр Л.Баттөмөр Есүс Христийг дагахаар шийдвэр гарган баптисм хүртсэн нь энэхүү айлчлалын хамгийн баярт үйл явдлуудын нэг болсон юм. Тэдний гэр бүлээр дамжуулан Эзэн Бурхан олон хүнд хүрч ажиллаж байгаа нь бахархал төрүүлж байлаа.
Шаббатын хүндэтгэлийн цуглааны үеэр хүүхэд багачууд Библийн сургамжит түүхүүдийг сонсож, урам зориг хайрласан гэрчлэлүүдээр дамжуулан Бурханы хайрыг мэдэрсэн юм. Гэр бүл, Эмэгтэйчүүдийн хэлтсийн захирал Ц.Отгонтуяа Эзэний Үгийг тунхаглаж, гэр бүл, итгэл, найдварын тухай сэтгэл хөдөлгөм номлол айлдсан нь сүмийн гишүүдэд гүн сэтгэгдэл төрүүлж, Бурхантай улам ойртох хүсэл тэмүүллийг сэргээсэн юм.
Энэхүү үйлчлэлийн оргил мөчүүдийн нэг нь Хэрлэн голын эрэг дээр болсон усан баталгааны ёслол байлаа. Монголын Адвентист Чуулганы ерөнхийлөгч Б.Болдын үйлдсэн ариун ёслолоор дөрвөн хүн Есүс Христийг Аврагчаа хэмээн хүлээн зөвшөөрч, шинэ амьдралын замд хөл тавилаа. Тэнгэр элчүүдийн баяр хөөртэй адил чуулганы гэр бүл бүхэлдээ баярлан талархаж, Бурханы авралын хүчийг хамтдаа гэрчилсэн онцгой өдөр байлаа. “ЭЗЭН агуу үйлсийг бидний төлөө үйлдсэн тул бид баяр хөөрөөр дүүрсэн билээ.” (Дуулал 126:3)
Харилцаа холбооны хэлтэс 2026.06.14
