“World Ambassadors Day” буюу "Дэлхийн Элч нар”-ын өдрийг Монголд, Африкт, Индонезид, Австралид гээд дэлхийн өнцөг булан бүрт байгаа итгэгч олон мянган залуучууд тэмдэглэн өнгөрүүллээ. Тэд нэгэн зорилго хүслийн дагуу Тэнгэрлэг Эцгээ хамтдаа магтан, залбирч байна.
Залуус Нэг итгэл. Нэг дуудлага уриатайгаар энэ өдрийг тэмдэглэн өнгөрүүлж байна.
Энгийн нэг тодорхойлолтоор бол ЭЛЧ гэдэг нь нэг улс өөрийн албан ёсны төлөөлөгчийг өөр улсад илгээхийг хэлдэг.
Харин итгэгч бидний хувьд энэ ойлголт илүү гүн гүнзгий утгатай. "Иймээс бид Христийн төлөөх элчин сайд юм хэмээн 2 Коринт 5:20-д бичсэнчлэн бид зөвхөн итгэгчид биш, илгээгдсэн хүмүүс гэдгээ ухамсарлах хэрэгтэй. Бидний үг, үйлдэл, бусадтай харьцаж байгаа байдал, амьдрал гээд бүгд Христийг илэрхийлдэг байх учиртай. Христ энэ дэлхийд хүмүүст үйлчилсээр байсныг мартаж болохгүй.
Залуу хүмүүс заримдаа ингэж боддог "Би пастор хүн биш, юу хэлэхээ мэдэхгүй байна" гэж… ”Гэхдээ үгнээс илүү үйлдлээрээ харуулдаг байх нь хамгийн чухал” гэдгийг санаарай.
Есүс шавь нартаа "Та нар бол энэ дэлхийн давс ба гэрэл хэмээн хэлсэн байдаг. Мэдээж давс бол хоолонд амт оруулдаг. Гэрэл харанхуйг гэрэлтүүлдэг.
Залуус та бүхэн сургуульдаа, нийгэмдээ, гэр бүлдээ Христийн хайрыг амьдралаараа харуулах учиртай. Заримдаа хүмүүс бидний үгийг мартдаг ч үйлдлийг хэзээ ч мартдаггүй.
1991 онд анхны миссионерууд Монголд ирсэн. Тэд хүйтэн цаг агаартай, соёл түүх уламжлалыг сайн мэдэхгүй байсан ч огтхон ч эргэлзэлгүйгээр Бурханд үйлчилж эхэлсэн байдаг. Энэ түүхийг үргэлжлүүлэх хүмүүс бол залуус та бүхэн.
Залуус та нар ирээдүйд сүм чуулганаа авч явах өнөөдрийн сүм, маргаашийн удирдагчид юм. Тиймээс “Дараа нь” гэж хэлэх биш яг одоо босч, оролцох цаг нь ирсэн байна. Та бүхэн жижиг алхмаас эхлээрэй.
Дотны найзаа анхааралтай сонс, урамшуул, үйлчил. Эдгээр жижиг зүйлс Бурханы хаанчлалыг тэлэхэд таныг хөтлөн дагуулах болно.
Учир нь бид бол Христийн Элч нар. Тиймээс явцгаая, үйлчилье, хуваалцъя хэмээн залуус та бүхэнд уриалж байна.
Харилцаа Холбооны хэлтэс 2026.04.10
