– Та өөрийгөө танилцуулахгүй юу?
Намайг Жонас Аррайс гэдэг. Би Хойд Ази-Номхон далайн бүсийн Сүмийн үйлчлэлийн нийгэмлэгийн нарийн бичгийн дарга бөгөөд дэд ерөнхийлөгчөөр үйлчилдэг. Мөн манай бүс нутагт шинэ теологийн боловсролын хөтөлбөрийг байгуулах ажилд идэвхтэй оролцож байна.
– Энэ төслийн талаар товч танилцуулна уу?
Энэхүү санаачилга “Үгийг судалж, дуудлагаар амьдрахуй” гэсэн уриан дор хэрэгжиж байна. Манай бүс нутгийн пасторуудыг чадавхжуулж, мэргэжлийн түвшинд хүргэх яаралтай хэрэгцээг ойлгон бид эхлээд залбирлаар эхэлсэн. Үүний хариуд Бурхан энэ төслийг урагшлуулах үүд хаалгуудыг нээсэн—гайхалтай нь, ямар нэг баталгаатай санхүүжилтгүйгээр. Энэ үнэхээр итгэлийн алхам байсан. Эргээд харахад бид үүнийг заримдаа “сая долларын төсөл” гэж нэрлэдэг.
Одоогоор хөтөлбөр Монгол, Непал, Шри-Ланкад хэрэгжиж байгаа бөгөөд 90 гаруй оюутан суралцаж байна. Долдугаар сард бид Пакистан (20 оюутан) болон Бангладеш (60 гаруй оюутан)-д өргөжүүлэхээр төлөвлөж байна. Ингэснээр нийт таван улсын бараг 200 оюутан үр шимийг нь хүртэнэ. Харьцуулж хэлбэл, Андрюс их сургуульд гурван докторын оюутан бэлтгэх зардлаар эдгээр 200 оюутныг сургах боломжтой. Нэг оюутанд дунджаар 6000 ам.долларын хөрөнгө оруулалт ноогдож байна.
Судалгаагаар Монгол, Шри-Ланка, Непал зэрэг орнуудад пасторуудын 80 гаруй хувь нь албан ёсны теологийн боловсролгүйгээр үйлчилдэг байна. Иймээс Тайваний Адвентист коллежийн энэхүү өргөтгөсөн хөтөлбөр цаг үеэ олсон, зайлшгүй хэрэгцээтэй юм. Эдгээр бүс нутагт сургалт олгох боломж бүрдэж буй нь Бурханы удирдлагыг тодхон харуулж байна. Хөтөлбөр жилд хоёр удаа 4 болон 10-р сард нэг сарын эрчимжүүлсэн сургалтаар явагдаж, нийт 129 академик кредитийг багтаадаг.
– Энэ төслийн онцлог нь юу вэ?
Теологийн сургалт янз бүрийн хэлбэрээр өмнө нь байсан ч эдгээр бүс нутагт олон улсын хэмжээнд хүлээн зөвшөөрөгдсөн гэрчилгээ олгодог хөтөлбөр байгаагүй. Энэ санаачилгын онцлог нь бүрэн магадлан итгэмжлэгдсэн Теологийн бакалаврын зэрэг олгодогт оршино. Бүр гайхалтай нь, оюутнууд сургалтын төлбөр төлдөггүй. Үүнийг боломжтой болгож буй Ерөнхий Чуулган, Хойд Ази-Номхон далайн дивиз, Монголын Адвентист Чуулганы санхүүгийн дэмжлэгт бид гүн талархаж байна.
– Яагаад теологийн боловсрол тийм чухал вэ?
Боловсрол нь үйлчлэлийн үр нөлөө, мэргэн ухааныг нэмэгдүүлдэг. Өнөөгийн сүмд зохих сургалт маш чухал. Жишээ нь: Та туршлагагүй нисгэгчтэй нисэх үү, эсвэл мэргэжлийн бэлтгэгдсэн нисгэгчтэй нисэх үү? Яг энэ зарчим пасторын үйлчлэлд ч хамаарна. Пасторууд илүү сайн бэлтгэгдсэн байх тусам тэдний үйлчлэл илүү үр жимстэй болж, сүмийн өсөлт, хамт олны бэхжилтэд нөлөөлдөг. Мөн бид сургалтын чанарт онцгой анхаарч, олон улсын болон дотоодын теологийн мэргэжилтнүүдийг урьж оролцуулдаг. Энэ нь хөтөлбөрийг улам бэхжүүлж байна.
– Сургалтын хөтөлбөрийг товч танилцуулахгүй юу?
Хөтөлбөрт Библийн судлал, Хуучин Гэрээ (хуулийн таван ном ба эш үзүүлэгчид), Еврей хэл, Шинэ Гэрээ (Сайн мэдээ ба элч нарын захидлууд), Эртний Грек хэл (1, 2-р түвшин), Практик үйлчлэл зэрэг олон хичээл багтдаг. Энэ бол бүрэн бүтэцтэй, иж бүрэн теологийн боловсролын хөтөлбөр юм.
– Оюутнууд болон сүмийн гишүүдэд хандаж хэлэх сүүлийн үг?
Монгол оюутнуудад хандаж хэлэхэд, энэ бол ховор бөгөөд үнэ цэнтэй боломж. Та бүхэн олон улсын хэмжээнд хүлээн зөвшөөрөгдсөн, өндөр чанартай боловсролыг үнэ төлбөргүй авч байна. Суралцахдаа чин сэтгэл, хичээл зүтгэл, тууштай байдлаар хандахыг уриалж байна. Мөн пасторын боловсрол, хөгжлийг тууштай дэмжиж буй Монголын Адвентист Чуулганд бид талархаж байна. Энэ санаачилга болон оролцож буй бүх хүмүүст Бурхан цаашид ч замчилж, ерөөх болтугай.
Харилуаа Холбооны хэлтэс 2026.04.07
